Міжнародны дзень роднай мовы
21.02.2022Кажуць, мова мая аджывае
Век свой ціхі: ёй знікнуць пара.
Для мяне ж яна вечна жывая,
Як раса, як сляза, як зара.
Пімен Панчанка
21 лютага ва ўсім свеце адзначаецца Міжнародны дзень роднай мовы. Гэта свята аб'ядноўвае людзей рознага ўзросту і прымушае задумацца аб лёсе роднай мовы ў межах грамадства. У нашай школе свята прайшло пад слоганам «Рускай мове дай разгрузку – гавары па-беларуску». На працягу дня ў школе працаваў відэахол, дзе гучалі песні, вершы і мультфільмы на роднай мове для вучняў усіх узростаў. Таксама для вучняў і настаўнікаў працавала фотазона «Ручнік – жыцця аздоба...», выстава кніг «Святло роднай мовы!» У школьным краязнаўчым музеі была арганізавана выстава нацыянальных страў і напояў «Смак беларускай мовы».
Вельмі цікава і займальна было на працягу дня каля інтэрактыўнай дошкі. Каля яе дзеці змаглі пабыць у якасці перакладчыкаў, моўных экспертаў, успомнілі любімыя словы на беларускай мове, а таксама склалі ўласныя хэштэкі, прысвечаныя святу. Вучні 11 класа паўдзельнічалі ў гульні «Размаўляй па-беларуску». Вучні 10 класа прынялі ўдзел у анлайн-дыктоўцы, арганізаванай Беларускім дзяржаўным педагагічным універсітэтам імя Максіма Танка.
Дзень роднай мовы прайшоў у цёплай душэўнай атмасферы любові і замілаванасці да нацыянальнай спадчыны, яе старажытных традыцый і культурных каштоўнасцей. Нам у спадчыну засталася ўнікальная мова – жывая і мілагучная, песенная і паэтычная, старажытная і сучасная. І трэба зрабіць усё магчымае, дзеля яе захавання!